ഒരു നിമിഷം

കടലൊരു തിര


മറ്റൊരു തിര

വീണ്ടും...



തിരികെപ്പോവും തിര

തിരിഞ്ഞൊന്നു നോക്കിയാല്‍

കാണാം



മണല്‍‌പുറ്റുകള്‍ക്കു മേല്‍

സര്‍പ്പമുട്ടകള്‍ കൊത്തിയുടയ്ക്കും

പക്ഷിപ്രേതം



ആയിരം നക്ഷത്രങ്ങളിലും

അമാവാസിക്കിരുട്ട്

ഒരൊറ്റച്ചന്ദ്രന്റെ

ധവളരക്തത്തില്‍

കുതിരും പൌര്‍ണമി



മറുകര കാണാതെ

തിരികെപ്പോരും കടല്‍പ്പാലം

കാലങ്ങളോളം

കാത്തിരുന്നു മടുക്കും



ചില്ലുകൊണ്ട്

ചില്ലെറിഞ്ഞുടയ്ക്കും

ഒരേ മനസ്സിന്റെ രേഖാശാസ്ത്രം

വിരലില്‍ പാകമാകാത്ത മോതിരം

വലിച്ചെറിയാന്‍ തുടങ്ങുമ്പോള്‍‌‌‌



ഒന്നു നില്‍ക്കണം

എന്നു പറയുന്നുണ്ട്:

അതിന്റെ തന്നെ കൈകളാല്‍

ഞെരിഞ്ഞു പിടയുന്ന

ഒരു നിമിഷം...